Krefjast stefnubreytingar í málefnum skuldara

Kröfufundur Hagsmunasamtaka heimilanna og samtakanna Nýs Íslands sem fór fram í dag krefst tafarlausrar og afgerandi stefnubreytingar stjórnvalda í málefnum skuldara.

„Á Íslandi er réttarstaða skuldara gagnvart lánadrottnum sú lakasta í allri norðurálfu. Þúsundir landsmanna hafa með þessum hætti verið ofurseldar óvægnum fjármálastofnunum fyrir lífstíð, samtímis því sem hagur hinna efnameiri vænkast dag frá degi," segir í ályktun sem samþykkt var á fundinum.

Þar er krafist að þegar í stöð verði sett lög sem bæti réttarstöðu skuldara til jafns við það sem þekkist annarsstaðar. „Fundurinn krefst þess að stökkbreyttur höfuðstóll lána verði leiðréttur.

Fundurinn krefst einnig tafarlausrar og afgerandi lækkunar vaxta.

Að bannað verði að tengja vexti við vísitölur eða gengi erlendra gjaldmiðla."