Guðríður fékk tæplega 90% atkvæða

Guðríður Arnardóttir, oddviti Samfylkingarinnar í Kópavogi, hlaut afgerandi kosningu í 1. sætið, 202 atkvæði eða 87,4% atkvæða í forvali flokksins sem fer nú fram í Smáraskóla. Aðrir fengu 3% atkvæða, auðir seðlar og ógildir voru tæp 10%.

Gengið var til kosninga um fyrstu þrjú sætin klukkan tæplega hálf eitt í dag. Jóhanna Sigurðardóttir, forsætisráðherra og formaður Samfylkingarinnar, flutti ávarp á fundinum skömmu fyrir klukkan eitt.

Guðríður var ein í framboði í fyrsta sætið

Hafsteinn Karlsson, bæjarfulltrúi, og Þorsteinn Ingimarsson, sölu- og markaðsstjóri, buðu sig fram í 2. sætið en alls voru átta í framboði til 3. sætis. Alls kusu 231.

Hafsteinn fékk einnig afgerandi kosningu í 2. sætið, fékk 180 atkvæði af 231 atkvæði eða 77,9%. Þorsteinn fékk 40 atkvæði eða 17,3%. Aðrir hlutu færri atkvæði. Auðir seðlar voru 6.

Átta gáfu kost á sér í 3. sætið og fengu þeir Pétur Ólafsson og Tjörvi Dýrfjörð flest atkvæði. Kosning stendur nú yfir um þá tvo en að því loknu verður kosið milli fimm kvenna í 4. sætið. Þeirra Elvar Logadóttur, Guðrúnar Jónu Jónsdóttur, Hjördís Erlingsdóttir, Svölu Jónsdóttur og Margrétar Júlíu Rafnsdóttur.

Samfylkingin fékk fjóra bæjarfulltrúa kjörna í kosningunum 2006, Sjálfstæðisflokkur fimm, Framsóknarflokkur einn og VG einn. Bæjarfulltrúarnir Jón Júlíusson og Flosi Eiríksson gefa ekki kost á sér til áframhaldandi setu í bæjarstjórn.