160 kindur fjarlægðar

Samtals 160 kindur voru teknar af sauðfjárbýlinu Stórhóli í Djúpavogshreppi í fyrrakvöld. Þetta staðfestir Halldór Runólfsson yfirdýralæknir.

Ábúandi Stórhóls var fyrir dómi í desember vegna vanfóðrunar og óviðunandi aðbúnaðar sauðfjár. Málinu lauk með dómsátt, þar sem bóndanum var gert að greiða áttatíu þúsund krónur í ríkissjóð.

Að sögn Halldórs var gripið til þessa úrræðis nú þar sem talið er að ekki hafi verið húspláss fyrir þennan hóp. Talið er að fjárhúsin á Stórhóli rúmi 820 og var hópurinn umfram þá tölu.

Ábúendur fengu fjögurra sólarhringa andmælarétt, en féð er á vegum Djúpavogshrepps nú.

Halldór segir að héraðsdýralæknir hafði gert úttekt á aðstæðum á Stórhóli í desember. Í kjölfarið hafi verið gerð krafa um tilteknar úrbætur. Í janúar hafi frestur til að gera úrbæturnar verið runninn út.

„Þá hafði það ekki verið lagað sem þurfti að laga,“ segir Halldór. „Þess vegna var farið í að vörslusvipta ábúendur því fé sem var umfram það sem þeir gátu haft. Síðan á eftir að koma í ljós hvað verður um þessar kindur.“

Halldór segir að eftirlit verði haft áfram með búfjárhaldi á Stórhóli.

- jss