Kettir gætu kennt þingmönnum ýmislegt

Þingflokkur VG hittist á fundi klukkan hálftvö í dag þar sem meðal annars verður rætt um ketti, í kjölfar ummæla forsætisráðherra um kattasmölun. Þingmaður VG segir að kettir séu göfug góð og vitur dýr sem hafi margt til eftirbreytni.

Ræða Jóhönnu Sigurðardóttur, forsætisráðherra og samfylkingarkonu, á virðist hafa reitt marga vinstri græna til reiði. Hún vísaði til samflokkskonu um að stjórnarsamstarfið væri um margt eins og að smala köttum. Jóhanna vísar í þessu sambandi til mismikillar samstöðu stjórnarflokkanna um Icesave, samstarfið við Alþjóðagjaldeyrissjóðinn og svo núning við samstarfsflokkinn vegna sameiningar ráðuneyta og svo ríkisstofnana í kjölfarið.

Birgir Hermannsson, stjórnmálafræðingur, segir að ríkisstjórnin hafi um langt skeið haft ýmis einkenni minnihlutastjórnar. Hann segir ummæli Jóhönnu um helgina ekki hafa komið á óvart, en telur að þau muni ekki leiða til stjórnarslita. Líf ríkisstjórnarinnar mun að hans mati fyrst og fremst snúast um hvernig takist að ná samstöðu um efnahagsáætlun AGS, ríkisfjármálin og önnur stór mál.

Þingmenn vinstri grænna funda síðar í dag eins og gjarnan á mánudögum. Ummæli forsætisráðherra eru meðal þess sem þar verður rætt. Þingmaður Vinstri grænna, sem fréttastofa náði sambandi við í morgun, staðfesti að þar yrði rætt um ketti, enda væru þeir góð, göfug og vitur dýr sem hefðu margt til eftirbreytni.