Fleiri gera vínin heima

Magnús Axelsson, rekstrar-stjóri og einn eigenda Ámunnar, segir verslunina hafa átt tryggan viðskiptavinahóp um árabil, líka í góðærinu þegar verð á innfluttum flöskuvínum lækkaði mikið. Hann bætir við að löngum hafi verið ódýrara að gera vínin sjálfur en kaupa þau út úr búð. Nú sé munurinn talsverður. Fordóma hafi áður gætt í garð heimagerðra vína. Þeir hafi horfið í tímans rás enda bilið á milli góðra heimagerðra vína og framleiddra í verksmiðju orðið nánast ekki neitt í dag. „Fólk er að búa til góð vín til að njóta þeirra,“ segir hann og bendir á að helst finni byrjendur í víngerð fyrir muninum. „Þeir byrja stundum að neyta afurðarinnar áður en hún nær toppgæðum. Gott og bragðmikið rauðvín þarf allt frá tveimur og upp í sex mánuði á flöskum. Eftir því sem þau eru geymd lengur verða þau betri,“ segir hann.

Þrúgur til bruggunar á rauðvíni og hvítvíni kosta frá tæpum tíu þúsund krónum til tæpra tuttugu þúsund króna. Því má ætla að hver flaska af heimagerðu víni kosti frá um 440 til 720 króna.