Styttist í nýja sundlaug á Blönduósi

Þegar allir kipptu að sér höndum haustið 2008, við hrun bankanna, hófu Blönduósingar að smíða sundlaug. Áætlað er að hún muni kosta um 400 milljónir króna með þreksal en hún er samtengd íþróttahúsinu.

Arnar Þór Sævarsson bæjarstjóri segir að menn hafi metið það svo, þegar lagt var af stað, að þessi framkvæmd myndi skapa mörg störf. Það hafi sýnt sig að hún hafi bjargað mörgum fyrirtækjum og aðilum sem vinna við sundlaugarsmíðina.

Aðallaugin er 25 metrar á lengd og átta metrar á breidd. Heitir pottar, busllaug fyrir börnin ásamt rennibrautum fylgja með. Ekkert hefur verið hægt að synda á Blönduósi í tæpt ár eftir að gömlu lauginni var lokað. En það stendur allt til bóta því nýju laugina á að opna þann 15. maí.

Bæjarstjórinn segir menn vænta þess að sundlaugin muni trekkja að ferðamenn og margir hafi talað um að hún hafi verið það eina sem hafi vantað í þetta góða samfélag á Blönduósi.