Landsbankinn ætlar ekki að auglýsa íbúðir

Landsbankinn ætlar ekki að auglýsa íbúðir sem þeir hafa leyst til sín frá einstaklingum á heimasíðu sinni, til að slá á tortryggni í samfélaginu, en segir allar stærri eignir auglýstar á heimasíðu dótturfélags, sem heitir Reginn.

Elliheimilið Grund keypti í gær 78 þjónustuíbúðir í þremur blokkum við Suðurlandsbraut af Landsbankanum á rúma 2 milljarða króna. Við söluna þurfti bankinn að afskrifa yfir milljarð króna. Blokkirnar voru aldrei auglýstar opinberlega eftir að Landsbankinn tók þær yfir, eftir því sem næst verður komist. Ásmundur Stefánsson bankastjóri Landsbankans, segir að það hefði engu breytt í ferlinu að auglýsa þessa eign opinberlega.

Þess má geta að þegar fréttastofa sló inn leitarorðið Regin á heimasíðu bankans lenti hún á slóð þar sem segir að skjal finnist ekki. Þegar orðið Reginn er gúglað, finnst hins vegar heimasíða á slóðinni reginnehf.is, og þar er að finna lista yfir stærri eignir í eigu Landsbankans sem eru til sölu eða leigu.