Hraunið myndar skeifu um skjöldinn

Systkini Dagmarar Kristvinsdóttur, íslensku stúlkunnar sem lést, settu upp skjöldinn fyrir sjö árum til minningar um systur sína og hin tvö sem urðu þarna úti á hvítasunnu vorið 1970, þau Elisabetu Brimnes frá Færeyjum og Ivar Stampe frá Danmörku.

Stúlkurnar létust á þeim stað þar sem eldgosið kom upp, að því er fram kom í viðtali við bróður Dagmarar, Ómar Kristvinsson, um síðustu helgi, en fjölskyldan var þá að kanna hvort skjöldurinn væri kominn undir hraun. Þau hafa nú fengið staðfestingu á því, með þessari ljósmynd Ásu Ögmundsdóttur, að skjöldurinn hefur enn sem komið er sloppið. Hrauntungurnar frá gígnum eru þó farnar að þrengja að honum og mynda núna skeifu utan um staðinn.

Eina færa leiðin að skildinum er núna um hinn hrikalega Heljarkamb en beggja vegna hans blasir við hengflug ofan í gilin tvö sem hraunið fossar niður í. Skjöldurinn er um 200 metra frá hraunjaðrinum og uppi í hæð, sem hefur til þessa varið hann gegn hraunrennslinu, en ef gosið verður langvarandi og hraunstaflinn hækkar, gæti skjöldurinn orðið jarðeldinum að bráð. Nánar verður fjallað um slysið hörmulega í Ísland í dag hér á eftir.