Nýr sendiherra afhenti Ólafi Ragnari trúnaðarbréf sitt

Luis E. Arreaga, nýr sendiherra Bandaríkjanna á Íslandi, afhenti forseta Íslands trúnaðarbréf sitt í dag. Barack Obama, forseti Bandaríkjanna, tilnefndi Arreaga í embættið þanna 22. apríl síðastliðinn og öldungadeild Bandaríkjaþings staðfesti svo tilnefninguna 5. ágúst síðastliðinn. Hann var svo svarinn í embætti, fyrir tíu dögum síðan eða 10. september.

Luis Arreaga kemur úr röðum bandarísku utanríkisþjónustunnar, áður en hann var tilnefndur fór hann fyrir mestu fjölgun sem orðið hefur í starfsliði bandarísku utanríkisþjónustunnar, segir í tilkynningu.

„Arreaga var áður varasendiherra Bandaríkjanna í Panama, aðalræðismaður Bandaríkjanna í Vancouver í Kanada og yfirmaður hjá framkvæmdadeild utanríkisráðuneytisins í Washington. Hann hefur einnig sinnt starfi aðstoðaryfirmanns aðgerðastjórnar utanríkisráðuneytisins og verið sérlegur aðstoðarmaður eins af aðstoðarutanríkisráðherrum Bandaríkjanna. Hann hefur einnig unnið við sendiskrifstofu Bandaríkjanna hjá Sameinuðu þjóðunum í Genf, í bandaríska sendiráðinu í Madrid, og hjá sendiskrifstofum Þróunarmálastofnunar Bandaríkjanna í Perú, El Salvador og Hondúras.

Luis Arreaga er fæddur og uppalinn í Guatemala en fluttist síðar til Bandaríkjanna. Hann er með mastersgráðu í stjórnun og doktorsgráðu í hagfræði frá University of Wisconsin í Milwaukee. Arreaga er kvæntur Mary F. Kelsey og eiga þau þrjú börn," segir í tilkynningu.