Óviss um hvort spillingarumræðan hafði áhrif á niðurstöðuna

Ármann Kr. Ólafsson er að vonum ánægður með árangur sinn í prófkjöri sjálfstæðismanna í Kópavogi í gær. Ármann hreppti fyrsta sætið í prófkjörinu og mun þar af leiðandi leiða sjálfstæðismenn í komandi kosningum.

„Þessi árangur er fyrst og fremst að þakka því að þau málefni sem ég lagði til grundvallar þar sem horft er til framtíðar. Þá er alveg ljóst að fólk vildi sjá breytingar," segir Ármann. Hann segir að niðurstaðan sé mikil traustsyfirlýsing við sig. „Ég fæ yfir 50 % í fyrsta sætið þannig að þetta er afgerandi," segir Ármann. Hann segir að mikill árangur búi að baki prófkjörssigrinum. „Ég er þakklátur fyrir þá vinnu sem stuðningsmenn mínir lögðu á sig," segir Ármann.

Mótframbjóðandi Ármanns, Gunnar Birgisson, var sakaður um óvandaða stjórnsýslu í aðdraganda prófkjörsins. Ármann segist ekki vilja dæma um hvort sú umræða hafi haft áhrif á niðurstöðu prófkjörsins. „Það er þannig að í prófkjöri og í kosningabaráttu almennt þá fer oft margvísleg umræða af stað. Hvað einstaka umræða í fjölmiðlum hafði að segja varðandi úrslitin að þá er ómögulegt að segja til um það," segir Ármann. Hann tekur þó fram að Gunnar Birgisson hafi unnið gott starf í gegnum tíðina.

Ármann telur að listinn sem var kosinn í gær sé sigurstranglegur. Þarna sé sambland af fólki með reynslu úr sveitastjórnarmálum og atvinnulífinu „Og bara mikið af frambærilegu fólki almennt," segir Ármann.

Þrátt fyrir ítrekaðar tilraunir hefur Vísir ekki náð tali af Gunnari Birgissyni.