Skiptar skoðanir um kattahald í bæjarráði Kópavogs

„Ég fylgi þessu máli stíft eftir, ég lofa því. En ef ég á að vera raunsæ þá verður engin ákvörðun tekin fyrr en í september þegar að bæjarstjórn kemur aftur saman," segir Guðríður Arnardóttir, oddviti Samfylkingarinnar í Kópavogi. En hún sagði í samtali við Vísi fyrr í mánuðinum að hún myndi berjast fyrir samræmdum reglum um kattahald í bænum. Vísir hefur fjallað mikið um lausagöngu katta og villikatta.

Guðríður segist hafa lagt reglurnar til kynningar í síðustu viku og býst við því að málið verði tekið upp á bæjarráðsfundi á fimmtudaginn í næstu viku. „En mér heyrist tónninn vera þannig ef satt skal segjast, að það endi með því að við þurfum að taka þetta fyrir í bæjarstjórn í september. Og þá vonandi verður meirihluti fyrir því, en þetta gengur algjörlega þvert á flokka. Það eru skiptar skoðanir í mínum flokki (Samfylkingu) og það eru skiptar skoðanir í Sjálfstæðisflokknum, sitt sýnist hverjum," segir Guðríður. En bæjarráð er starfandi á meðan bæjarstjórn er í sumarleyfi.

Hún segir að ef reglurnar verði samþykktar í bæjarstjórn í september þá þurfi að auglýsa reglurnar í stjórnartíðindum og það tekur þrjá mánuði eða 90 daga. „Ef vel gengur gætu þessar reglur komið í gegn fyrir áramótin," segir Guðríður.

„Í mínum huga eiga að vera reglur um kattahald alveg eins og það eru reglur um hundahald. Það eru reglur um húsdýr, við erum ekki að leyfa lausagöngu sauðfjár innan bæjarmarkanna. Ef þú myndi fá þér kind, er ég alveg viss um að nágrannarnir yrðu ekki ánægðir ef hún væri að skottast út um allan bæ."

Hún segist hafa fengið mikil viðbrögð frá fólki eftir fréttir Vísis af málinu. „Ég er búin að fá mikil viðbrögð og hef fengið fjöldann allan af símtölum og tölvupóstum."