Nýtt frumvarp um sérstakan til að eyða óvissu

Ragna Árnadóttir, dómsmálaráðherra, kynnti á ríkisstjórnarfundi á föstudaginn frumvarp til breytingar á lögum um embætti sérstaks saksóknara, en tilgangur þess er að taka af allan vafa um verkefni og verksvið embættisins.

Í gildandi lögum um embætti sérstaks saksóknara er verksvið embættisins skilgreint þannig að embættið eigi að rannsaka mál sem snúi m.a starfsemi fjármálafyrirtækja og annarra lögaðila, eins og það er orðað. Orðalagi fyrstu greinar laganna verður breytt með nýju frumvarpi og mun nú einnig miðast við eigendur fjármálafyrirtækjanna sem eru til rannsóknar.

Aðspurður hvort verið sé að víkka út starfssvið embættisins segir Ólafur Þór Hauksson, sérstakur saksóknari, í samtali við fréttastofu að starfssvið embættisins sé tiltölulega vítt eins og það sé í dag. Frumvarp dómsmálaráðherra sé til þess fallið að taka af öll tvímæli um og skýra valdmörk embættisins. Hann segir að þetta sé til þess að eyða hugsanlegum vafa sem gæti valdið einhverri óvissu um valdmörkin þegar kemur að málarekstri fyrir dómi, því hið gagnstæða gæti þýtt að málum yrði vísað frá.

Frumvarp dómsmálaráðherra hefur ekki verið lagt fram á Alþingi, en það verður gert fljótlega, samkvæmt upplýsingum fréttastofu. Ekki náðist í Rögnu Árnadóttur dómsmálaráðherra í morgun.