Lokuðust inn í bankahvelfingu B5

Fimm menn lokuðust inni í bankahvelfingu í húsakynnum veitingastaðarins B-5 við Bankastræti í Reykjavík, þar sem Verslunarbankinn sálugi var til húsa á sínum tíma. Það var um þrjú leitið í nótt sem hurðin féll að stöfum og hrökk í lás. Fjórum tímum síðar sluppu þeir úr prísundinni.

Mennirnir hringdu á lögreglu, sem kallaði eftir tækjabíl slökkviliðsins, en slökkviliðsmenn sáu ekki möguleika á að opna nema með víðtækum aðgerðum.

Þar sem loftræsting er í hvelfingunni og að líkindum eitthvað til að væta kverkar, var ákveðið að bíða til morguns og leita þá nýrra úrræða og rétt fyrir klukkan sjö náðist að dýrka upp hurðina og hleypa mönnunum út. Þeir hafa vafalaust verið fegnir ferska loftinu.