Urgur er í stjórnarliðum vegna E.C.A.

„Þetta er algjörlega forkastanlegt," segir Steinunn Valdís Óskarsdóttir, þingmaður Samfylkingarinnar, um hugmyndir um hernaðarfyrirtæki á Keflavíkurflugvelli. Samflokksmenn hennar, Björgvin G. Sigurðsson og Róbert Marshall, hafa lýst sig fylgjandi hugmyndinni.

Björgvin sagði í samtali við Víkurfréttir á miðvikudag að málið hefði verið samþykkt í ríkisstjórn. Enginn ráðherra sem Fréttablaðið hafði samband við kannaðist við að málið hefði nokkru sinni ratað á borð stjórnarinnar.

Umsókn fyrirtækisins er á borði Flugmálastjórnar og líkt og Fréttablaðið greindi frá í gær er mat hennar langt komið. Samkvæmt heimildum blaðsins er niðurstaða hennar sú að breyta þurfi reglugerð eigi málið að ná fram að ganga. Þá kemur til kasta samgönguráðherra.

Árni Þór Sigurðsson, formaður utanríkismálanefndar Alþingis og þingmaður Vinstri grænna, leggst alfarið gegn hugmyndinni. „Ég tel að við höfum ekki þörf fyrir nýtt hermang hér á landi. Við börðumst nú mörg hver lengi fyrir því að herinn færi og það er ekki hægt að búast við að við stökkvum á þetta."

Hann segir að þótt illa ári geti Íslendingar ekki stokkið á hvað sem er þótt fjármunir séu í boði.

Steinunn Valdís segir málið aldrei hafa verið rætt í þingflokki Samfylkingarinnar.

„Ef marka má heimasíðu þessa fyrirtækis er ekki annað að sjá en að meginmarkmið þess sé stríðsrekstur. Ísland á ekki að setja nafn sitt við svona starfsemi og þetta er algjörlega á skjön við þá ímynd sem við þurfum að byggja upp.

Ég gef ekkert fyrir þau rök að þetta sé í nafni atvinnuuppbyggingar á Suðurnesjum. Við hljótum að setja einhver siðferðismörk um þá atvinnustarfsemi sem hér fer fram."

Nokkur kurr var í stjórnarliðum sem Fréttablaðið ræddi við í gær. Vísuðu sumir á stjórnarsáttmálann, að þessi starfsemi rímaði illa við ákvæði hans um að ríkisstjórnin leggi áherslu á baráttu fyrir friði og afvopnun og að Ísland verði boðið fram sem vettvangur fyrir friðarumræður.

kolbeinn@frettabladid.is

bjorn@frettabladid.is