Kristín skipuð forstjóri Útlendingastofnunar

Kristín Völundardóttir, sýslumaður á Ísafirði og lögreglustjóri Vestfjarða, hefur verið skipuð í embætti forstjóra Útlendingastofnunar, frá og með 1. apríl næstkomandi.

Embættið var auglýst laust til umsóknar 15. janúar og rann umsóknarfrestur út 4. febrúar síðastliðinn. Átta aðrir sóttu um stöðuna, þar á meðal Jónína Bjartmarz fyrrverandi þingmaður og ráðherra. Tveir drógu umsókn sína til baka.

Um Kristínu:

Kristín lauk embættisprófi í lögfræði frá Háskóla Íslands árið 1992 og L.LM.-gráðu frá McGill University í Quebec í Kanada árið 1994. Frá árinu 2007 hefur Kristín verið sýslumaður á Ísafirði og lögreglustjóri Vestfjarða. Árið 2006 var hún sýslumaður og lögreglustjóri á Hólmavík. Árið 2005 vann Kristín sem sérfræðingur á einkamála- og borgaraskrifstofu dóms- og kirkjumálaráðuneytisins og starfaði m.a. að útlendingamálum. Árið 2004 og fram í ársbyrjun 2005 var hún forstöðumaður leyfasviðs Útlendingastofnunar. Árið 2003 og fram til ársins 2004 starfaði Kristín sem lögfræðilegur ráðgjafi hjá Útlendingastofnun, en hún hóf störf hjá Útlendingaeftirlitinu árið 1999, sem gert var að Útlendingastofnun árið 2003. Árið 1999 vann Kristín hjá embætti ríkislögreglustjóra við meðferð hælisumsókna og almenna lögfræðilega aðstoð. Frá 1994-1999 starfaði Kristín hjá sýslumanninum í Kópavogi.