Peter lætur fjarlægja nafn sinnar fyrrverandi

Peter Andre, sem einusinni var þokkalega frægur söngvari en er nú þekktari sem fyrrverandi eiginmaður brjóstabombunnar Katie Price er farinn í meðferð. Ekki er þó um "hefðbundna" meðferð að ræða heldur gengst hann nú undir leysigeisla-aðgerðir til þess að fjarlægja nafn sinnar fyrrverandi af fingri sínum.

Þegar turtildúfurnar rugluðu saman reitum létu þau húðflúra nöfn hvors annars á sig. Peter lét setja nafn Katie, sem raunar er betur þekkt sem Jordan, á baugfingurinn sinn. Katie setti nafn Peters hinsvegar um úlnliðinn á sér.

Þau skildu fyrir nokkrum misserum og beið bomban ekki boðanna og lét húðflúra svartan kross yfir nafn eiginmannsins fyrrverandi. Peter segist hinsvegar hafa viljað bíða með að fjarlægja nafn Katie, „til þess að koma börnunum ekki úr jafnvægi."