Átök ef krónan styrkist ekki

„Við munum ekkert líða það að ákveðinn geiri hérna moki til sín hagnaði, það mun enginn sæta því,“ sagði Gylfi Arnbjörnsson, forseti ASÍ, þegar hagspá sambandsins var kynnt á dögunum. Í spánni er gert ráð fyrir lítilli styrkingu á krónunni til ársloka.

„Auðvitað mun þessi afkoma í útflutningsgreinunum fara inn í hagkerfið. Það hefur alltaf gerst á Íslandi þessa áratugi sem við höfum verið með sjálfstæðan gjaldmiðil að yfirhagnaður í sjávarútvegi og öðrum atvinnugreinum fer inn í aðrar greinar,“ sagði Gylfi.

Stjórnvöld og Seðlabankinn þyrftu að skilja að ef ekki næðist fram fimmtungs eða fjórðungs styrking á krónunni yrðu horfur á vinnumarkaði ekki bjartar. „Þá verða auðvitað átök um það.“ - gar