Cowell kallar Sting fábjána

Simon Cowell, sem þekktastur er fyrir raunveruleikaþættina American Idol og X Factor kallaði söngvarann Sting fábjána í sjónvarpsþætti vestanhafs um helgina.

„Í fyrsta lagi, sextugur karlmaður sem kallar sig Sting er fábjáni," sagði Cowell. Hann var þarna að bregðast við athugasemdum Stings. Sting hafði áður látið hafa eftir sér að X Factor þættirnir væru karókí í sjónvarpi.

Þau orð féllu í grýttan jarðveg hjá Cowell og þeirra verður sjálfsagt lengi minnst. Raunar gaf Cowell það í skyn að Sting vissi ekkert um hvað hann væri að tala.