Ekki stefnir í að listamenn sniðgangi Grímuna

Ekkert bendir til að listamenn muni sniðganga Grímuverðlaunin í ár, þrátt fyrir umræðu um aðkomu ráðamanna að verðlaununum. Formaður stjórnar Grímuverðlaunanna segir engan ráðamann afhenda verðlaun að þessu sinni.

Leikskáldið Jón Atli Jónsson sagði í tilkynningu í vikunni að hann myndi hafna tilnefningu til Grímunnar vegna aðkomu Ólafs Ragnars Grímssonar forseta Íslands, sem er verndari hátíðarinnar.

Ása Richardsdóttir formaður stjórnar Grímunnar segir að í apríl hafi verið ákveðið að engir ráðamenn myndu afhenda verðlaun á hátíðinni í ár vegna aðstæðna í samfélaginu. Hún segir að ekki stefni í að listamenn sniðgangi verðlaunaafhendinguna þrátt fyrir umræðu síðustu daga.

Björn Ingi Hilmarsson, varaformaður Félags íslenskra leikara, segir að félagið hafi ekki tekið afstöðu til málsins.