Farþegarnir til Oslóar en farangurinn til Köben

Mistök urðu þess valdandi að farangurinn víxlaðist þegar verið var að ferma tvær vélar frá Icelandair í dag sem fóru í loftið klukkan ellefu eftir að flugumferðarstjórar höfðu hætt í verkfalli. Vélarnar fóru til Kaupmannahafnar og Oslóar en farangurinn sem fara átti til Oslóar endaði í Kaupmannahöfn og öfugt.

Guðjón Arngrímsson upplýsingafulltrúi Icelandair segir að um mistök hafi verið að ræða og að málið tengist ekkert verkfalli flugumferðarstjóra. Hann segir að reynt verði að koma farangrinum á rétta staði svo fljótt sem auðið er.

Ferðalangur sem staddur var í Osló að leita að töskunni sinni sagðist óhress með að fá ekkert að vita um afdrif farangurs síns og sagði hann að þónokkrir væru að missa af tengiflugi til annara áfangastaða vegna þess að töskurnar vantaði.