Framkvæmdir bíða rétts tíma

Forsvarsmenn UB koltrefja í Skagafirði segjast enn vongóðir um að hægt verði að reisa koltrefjaverksmiðju í Skagafirði en staða á heimsmarkaði er hins vegar sú að ekki verður raunhæft að hefja framkvæmdir fyrr en eftir eitt til þrjú ár.

Feykir.is hefur þetta eftir Snorra Styrkárssyni, forstöðumanni verkefnisins, sem segir mikinn áhuga á verkefninu erlendis, eins og heimsóknir fimm samstarfsaðila til Íslands sýni. Fall á sölu koltrefja eftir hrun þýðir að verkefnið frestast. Eftirspurnin eftir koltrefjum er nú aðeins helmingur framleiðslugetu þeirra verksmiðja sem nú eru starfandi.

Snorri segir að hugmyndir um koltrefjaverksmiðju á Akureyri hafi engin áhrif á áætlanir UB koltrefja. - shá