Hjálpa geðsjúkum að ná tökum á lífi sínu

Samfélagsgeðteymi tekur formlega til starfa nú um mánaðamótin. Um er að ræða þverfaglegt teymi geðheilbrigðisstarfsmanna og tilheyrir það geðsviði Landspítalans. Markmið teymisins er að minnka þörf á innlögnum og tryggja góðan stuðning og eftirfylgd. Þungamiðjan í þjónustunni er vitjanir í heimahús og að virkja fólk til þátttöku í samfélaginu. Beiðnir um aðstoð eru þegar teknar að berast.

„Við erum sannfærð um að þjónusta sem þessi eykur lífsgæði þeirra sem þurfa á henni að halda,“ segir Magnús Haraldsson geðlæknir, sem starfar í teyminu. „Teymið er stofnað því það er mat manna að við þurfum að efla samfélagsgeðþjónustu við þá sem þjást af alvarlegum geðröskunum og eru í tíðum innlögnum á geðdeildir, svo og aðstandendur þeirra. Teymið er viðbót við þau úrræði sem göngudeildir geðsviðs veita og við geðteymi sem fyrir eru á vegum Velferðarsviðs og Heilsugæslu.

„Þetta er ekki sparnaðarúrræði þar sem verið er að veita ódýrari þjónustu fyrir dýrari, heldur er einungis verið að svara þörfinni úti í samfélaginu og breyta áherslum. Við erum enn langt á eftir öðrum þjóðum í þessu efni, sem sum hver hafa þróað þjónustu af þessu tagi í þrjátíu ár.“

Spurð hvort vissa sé fyrir því að fólk vilji að fagfólk fylgi því eftir inn á heimili þess segir Guðbjörg Sveinsdóttir teymisstjóri að langflestir vilji fá stuðning til þess að auka lífsgæði sín, getu og færni til að virka sem best í samfélaginu.

„Eitt af meginhlutverkum okkar er að tengja fólkið við þann stuðning sem er fyrir hendi úti í samfélaginu, hvort sem það er hjá velferðarsviði eða frjálsum félagasamtökum og þá að sleppa hendinni af fólki. Við erum ekki að gera þetta fyrir fólkið heldur með því, og aðstoða það við að ná tökum á daglegu lífi sínu. Ég hef ekki hitt neinn sem ekki vill það. En þessa samvinnu þarf fyrst og fremst að byggja á trausti. Aðstandendum er einnig boðin aðstoð og þeir eru oft ekki síður í þörf fyrir hana.“

Þegar beiðni berst teyminu er hún tekin fyrir á fundi, að sögn Guðbjargar. Sé tekin ákvörðun um aðkomu að málinu er haft samband við þann sem sendir beiðnina og síðan heimsækir fagfólk úr teyminu þann sem á aðstoð þarf að halda. Viðkomandi er gerð grein fyrir starfseminni og boðin aðstoð.jss@frettabladid.is