Var með 600 grömm af kókaíni innvortis

Sextugur karlmaður situr nú í gæsluvarðhaldi til 7. apríl eftir að hann var handtekinn við komuna til landsins í síðustu viku með rúmlega 600 grömm af kókaíni innvortis.

Maðurinn, sem er Lithái, var að koma frá Kaupmannahöfn þegar hann var stöðvaður á Keflavíkurflugvelli við hefðbundið eftirlit. Grunsemdir vöknuðu um að hann hefði fíkniefni innvortis og var hann því handtekinn. Í fyllingu tímans skilaði hann niður kókaíninu sem hann hafði sett í smokka og gleypt.

Maðurinn hefur ekki verið búsettur hérlendis né dvalið hér á landi svo vitað sé.- jss