Vilja banna kennitöluflakk

Þingmenn þriggja flokka lögðu fram á Alþingi í morgun frumvarp til þess að sporna við svokölluðu kennitöluflakki í rekstri fyrirtækja. Í greinagerð með frumvarpinu segir að tilgangur þess sé sá að slá varnagla við því að helstu eigendur og stjórnendur geti í skjóli takmarkaðrar ábyrgðar orðið uppvísir að því að keyra fyrirtæki sín í þrot ítrekað.

Í fyrstu grein frumvarpsins segir að heimilt sé að synja félagi skráningar eða afskrá það með hliðsjón af viðskiptasögu stjórnenda og helstu eigenda ef þeir hafa ítrekað verið þátttakendur í rekstri sem farið hefur í þrot.

Það er Lilja Mósesdóttir, þingmaður Vinstri hreyfingarinnar - græns framboðs, sem er fyrsti flutningsmaður frumvarpsins. Ásamt henni flytja frumvarpið þau Guðfríður Lilja Grjetarsdóttir VG, Þór Saari Hreyfingunni og Vigdís Hauksdóttir Framsóknarflokki.