Aðsóknarmet slegið á RIFF - Yfir 20 þúsund manns sótt hátíðina

Aðsókn að Alþjóðlegri kvikmyndahátíð í Reykjavík hefur farið fram úr væntingum aðstandenda hátíðarinnar og fyrir liggur að hátíðin í ár verður sú aðsóknarmesta frá upphafi. Yfir 20 þúsund manns hafa sótt hátíðina og er þar með slegið aðsóknarmet hátíðarinnar 2009. Í tilkynningu segir að það megi líta á það sem staðfestingu þess að kvikmyndahátíðin RIFF fer vaxandi með hverju árinu.

Kvikmyndahátíðin hefur fengið athygli erlendis frá en sjónvarpsstöðin ARTE hefur fylgst með hátíðinni síðustu daga.

Klukkan 20 í kvöld fer fram verðlaunaafhending RIFF 2010 í aðalsal Háskólabíós. Þá verða afhent aðalverðlaun hátíðarinnar fyrir bestu mynd keppnisflokksins sem nefnist Vitranir. Auk þess verða veitt áhorfendaverðlaun og Umhverfisverðlaun fyrir bestu myndina í þeim flokki. Við sama tækifæri verður íslenska myndin Brim frumsýnd í aðalsal Háskólabíós en að minnsta kosti þúsund manns hafa boðað komu sína.

Að venju verða aðsóknarmestu myndirnar endursýndar nú um helgina, en lokadagur hátíðarinnar er á sunnudaginn. Á meðal vinsælustu myndanna sem sýndar verða á sunnudaginn eru When The Dragon Swallowed The Sun, The Most Dangerous Man In America, The Edge og Flowers Of Evil. Ítarlegar upplýsingar um sýningar á sunnudaginn eru aðgengilegar á riff.is.