Nauðsynlegt að breyta reglum hjá VG

Formaður kjörstjórnar Vinstri grænna segir nauðsynlegt að breyta kosningareglum flokksins í ljósi þeirrar kvörtunar sem barst eftir forval Vinstri grænna í Reykjavík um síðustu helgi.

Þorleifur Gunnlaugsson, borgarfulltrúi Vinstri grænna, sendi inn kæru til kjörstjórnar flokksins um síðustu helgi. Taldi hann víst að stuðningsmenn Sóleyjar Tómasdóttur hefðu beitt ólögmætum aðferðum til að afla utankjörfundaratkvæða.

Þorleifur hafnaði í öðru sæti í forvalinu en Sóley í því fyrsta en aðeins munaði 40 atkvæðum. Krafðist Þorleifur þess að öll utankjörfundaratkvæði yrðu dæmd ógild. Það hefði þó ekki haft áhrif á röð efstu manna.

Kjörstjórn hafnaði kröfum Þorleifs þar sem sýnt þótti að stuðningsmenn Sóleyjar hefðu ekki beitt ólögmætum aðgerðum.

Stefán Pálsson, yfirmaður kjörstjórnar Vinstri grænna, segir hins vegar ljóst að breyta þurfi kosningareglum flokksins. „Ég held að það sé alveg ótvírætt," segir Stefán en tekur fram að reglurnar hafi dugað vel í síðustu forvölum. Þá megi reyndar hafa í huga að að þar voru leikar ekki eins jafnir og núna.

Ýmsar sögur hafa verið í gangi um að fulltrúar kjörstjórnar hafi beitt sér sérstaklega í þágu eins frambjóðenda. Þegar Stefán er spurður hvort eitthvað slíkt mál hafi komið inn á borð kjörstjórnar neitar hann því. „Það koma sögur sem fara á kreik eftir forvöl og kjaftagangurinn stundum með hreinum ólíkindum en við höfum ekki fengið neitt slíkt inn á okkar borð."