Harkar í Hollywood innan um atvinnulausa leikara

Darri Ingólfsson fer með aðalhlutverkið í kvikmyndinni Boðbera sem frumsýnd verður á miðvikudaginn kemur. Darri hefur verið búsettur í Los Angeles undanfarið ár og upplifað ýmislegt skemmtilegt á þeim tíma.

Darri nam leiklist í Arts Educational í London og útskrifaðist þaðan árið 2003 en dvaldi áfram í borginni eftir útskrift. „Ég held ég hafi verið hálf athyglissjúkur allt frá barnæsku og ég hef alltaf haft sterka þörf fyrir að tjá mig. Leiklistin er ágæt leið til að tjá sig, þó það séu ekki alltaf þínar eigin skoðanir sem þú ert að tjá. Nema kannski í þessu tilfelli, það er mjög margt í Boðbera sem endurspeglar mínar lífsskoðanir," segir Darri. Hann kynntist leikstjóra myndarinnar, Hjálmari Einarssyni, í Cannes árið 2006 en Darri segist hafa smyglað sér á hátíðina og alla leið í veislu á vegum tímaritsins Vanity Fair. „Vinur minn hafði ætlað fara ásamt nokkrum vinkonum sínum en forfallaðist og lét mig fá passann sinn í staðinn. Við ákváðum svo að smygla okkur inn í Vanity Fair veisluna, klæddum okkur í okkar fínasta púss og gengum beint inn á staðinn. Þetta var sama ár og Al Gore sýndi heimildarmyndina sína á Cannes og ég hitti hann þarna á dansgólfinu þar sem hann dansaði við eiginkonu sína."

Darri hefur verið búsettur í Los Angeles undanfarna mánuði og segir hann borgina fulla af atvinnulausum leikurum, handritshöfundum og leikstjórum. „Þetta er búið að vera mikið ævintýri en líka rosalegt hark. Ég hef þurft að vinna við ýmislegt bara til að halda mér á floti og vann um tíma sem pylsusendill." Darri segist hafa hitt ótrúlegasta fólk í gegnum það starf og nefnir tónlistarmanninn Busta Rhymes í því samhengi. „Hann er orðinn feitur núna og var hálf dónalegur en ég klesst'ann þegar við kvöddumst," segir Darri og hlær. „Núna vinn ég sem þjónn á veitingastað á Sunset Strip. Staðurinn er beint á móti Marmont hótelinu og við fáum því mikið af þekktu fólki til okkar. Jason Segel úr How I Met Your Mother er til dæmis fastakúnni hjá okkur." Inntur eftir því hvort hann fái aldrei nóg af harkinu í borg englanna svarar hann því neitandi. „Maður er alltaf að upplifa eitthvað nýtt þannig að mér finnst þetta þess virði." -sm