Ágóði af bolasölu fer í menningarsjóð Lennon

66°norður styrkir menningarsjóðinn Imagine Peace - Reykjavík Culture Fund með því að selja boli og plaköt. Ágóði af sölunni rennur í sjóðinn. Sjóðurinn verður formlega stofnaður á morgun þegar kveikt verður á Friðarsúlunn í Viðey. Reykjavíkurborg stofnar hann í samvinnu við Yoko Ono í tilefni af 70 ára fæðingarafmæli John Lennon.

Sjóðnum er ætlað að styrkja menningarverkefni og verður sérstaklega horft til verkefna sem tengist börnum og ungmennum.

Sigurjón Sighvatsson eigandi 66°norður hafði samband við forsvarsmenn sjóðsins um það hvernig fyrirtækið gæti komið að verkefninu og styrkt sjóðinn á einhvern hátt. Niðurstaðan var sú að 66°norður framleiðir og selur boli og plaköt merkt War is over - if you want it. Salan stendur yfir þá daga sem kveikt verður á friðarsúlunni eða dagana 9. október - 8. desember.

Allur ágóði af sölu bolanna og plakatanna verður ánafnaður Imagine Peace - Reykjavík Culture Fund.

Hægt verður að kaupa bolina í verslun 66°norður í Bankastræti og verður hluti verslunarinnar helgaður tilefninu þar sem m.a. verður hægt að lesa boðskap Yoko Ono og John Lennon um frið á jörð og betra mannlíf. Einnig verður hægt að kaupa bolina á tónleikum Yoko Ono Plastic Ono Band í Háskólabíó á morgun laugardaginn 9. október.