Kosið um breytingu á lögum

Í fyrsta skipti á lýðveldistímanum gefst þjóðinni færi á að kjósa um tiltekið mál í beinni þjóðaratkvæðagreiðslu. Málið sem liggur fyrir er hvort lög um breytingar á lögum um ríkisábyrgð vegna Icesave taki gildi.

Raunar hefur hún þegar tekið gildi, þar sem breytingarlögin tóku gildi þrátt fyrir synjun forseta Íslands. Eftir þeim hefur hins vegar, eðlilega, ekki verið farið og því er það þjóðarinnar að ákveða hvort svo verði.

Í upplýsingabæklingi ríkisstjórnarinnar er tilgreint hvað gerist eftir því hvort lögunum verður hafnað eða ekki. Þar segir að verði lögin samþykkt séu helstu óvissuþættirnir hvaða greiðslur fáist út úr slitameðferð Landsbanka Íslands hf. og hvenær þær berist. Að auki hvaða áhrif gengisþróun, hagvöxtur og aðrar aðstæður í þjóðarbúinu hafi.

Verði breytingartillögunni hafnað telst helsta óvissan hvaða ákvarðanir stjórnvöld á Íslandi, í Bretlandi og Hollandi taki um framhald málsins. Þá sé sama óvissan uppi um greiðslur úr slitameðferðinni.

Það er því alls ekki rétt, sem sumstaðar hefur verið ámálgað, að kosningarnar snúist um hvort greiða eigi skuldirnar sem urðu til vegna Icesave-reikninganna. Verði breytingarlögunum hafnað standa fyrri lögin eftir.

Semja þarf þó upp á nýtt þar sem Icesave-samningarnir frá í júní og október gætu ekki tekið gildi. Þar er kveðið á um að Bretar og Hollendingar samþykki fyrirvara Íslendinga. Þeir hafa þegar hafnað þeim.

kolbeinn@frettabladid.is