„Lúðvík sýndi mikið hugrekki“

„Ég er mjög sáttur við þetta. Rödd bæjarbúa heyrðist og það var tekið mark á henni," segir Hafnfirðingurinn Rúnar Sigurður Sigurjónsson, sem hefur verið iðinn við að safna undirskriftum hjá bæjarbúum til þess að knýja á íbúakosningu um ráðningu Lúðvíks Geirssonar, fyrrverandi bæjarstjóra Hafnarfjarðar, en hann tilkynnti að hann myndi ekki taka við embætti bæjarstjóra í morgun.

„Hann er maður meiri fyrir að hafa hlustað á fólkið í kringum sig og stigið niður og það ber að hrósa honum fyrir það. Hann sýndi mikið hugrekki," segir Rúnar en áréttar að það þurfti heldur mikið til þess að Lúðvík sýndi hugrekkið.

Aðspurður segist Rúnar hafa verið búinn að safna tæplega þúsund undirskriftum á hálfum mánuði.

Í yfirlýsingu sem Lúðvík sendi frá sér sagði: „Í ljósi þeirra eftirmála nýliðinna kosninga og ákvarðana um skipan í embætti bæjarstjóra er einboðið að ekki mun ríkja sú almenna sátt sem er að mínu mati nauðsynleg til að viðhalda áfram víðtækri samvinnu og samráði í bæjarfélaginu."

Það er oddviti Samfylkingarinnar í Hafnarfirði, Guðmundur Rúnar Árnason, sem tekur við sem bæjarstjóri. Áður hafði Lúðvík gegnt embættinu í átta ár.