Spyr um bónuskerfi bankanna

Lilja Mósesdóttir, formaður viðskiptanefndar Alþingis, hyggst kalla fulltrúa bankanna og bankasýslu ríkisins á fund nefndarinnar til að spyrja þá út í hugmyndir sem uppi eru innan bankanna um að taka á ný upp bónuskerfi. Þá mun hún einnig lýsa skoðun nefndarinnar á málinu.

Fréttablaðið greindi frá því í fyrradag að innan bankanna stæði til að taka aftur upp árangurstengdar greiðslur til starfsmanna. Spunnust um þetta umræður á Alþingi í gær og létu tveir þingmenn Samfylkingarinnar hörð orð falla í garð bankanna. Þeir sögðu að ef af yrði þyrfti að skattleggja greiðslurnar mjög hátt og annar þeirra vildi að rætt yrði hvort ekki mætti banna slíka bónusa.

Landsbankinn sendi frá sér yfirlýsingu í gærkvöldi þar sem sagði að umræða um innleiðingu kaupaukakerfis væri algjörlega ótímabær. Ekkert slíkt kerfi hafi verið tekið upp, bankaráðið hafi ekki rætt það og engin útfærsla verið samþykkt.

Hugsanlegt sé að slíkt kerfi verði að veruleika í árslok 2012 þegar sá hluti eignasafn bankans sem hugmyndir eru um að muni mynda kaupaukastofnun hefur verið endurmetinn. Ekkert sé hins vegar hæft í því að starfsmenn myndu fá kaupauka fyrir að ganga hart fram gagnvart skuldurum. - sh