Ástaróður til eiginmannsins

„Þetta er samið til hans. Maður er svo rómantískur,“ segir söngkonan Kolbrún Eva Viktorsdóttir sem tekur þátt í Eurovison í fyrsta sinn níunda janúar. Lagið sem hún syngur nefnist You Are The One, eða Þú ert sá eini rétti, og fjallar um eiginmann hennar og lagahöfundinn Harald Gunnar Ásmundsson. Saman mynda þau hljómsveitina Myst sem gaf út sína fyrstu plötu fyrir fjórum árum.

Að sögn Kolbrúnar Evu ætluðu þau hjónin ekki að taka þátt í Eurovision en skjótt skipast veður í lofti. „Eitt kvöldið byrjaði maðurinn að spila og leika sér eitthvað á meðan ég lagði mig. Svo kom ég niður og heyrði þvílíkt flott lag,“ segir hún. „Þá var hann búinn að semja lagið. Þannig að ég henti bara inn texta og söng það inn um nóttina.

Svo brunaði hann í bæinn seinasta skiladaginn með fjörutíu stiga hita og birtist skjálfandi með lagið. Það var alveg ótrúlega gaman þegar við fengum símhringinu um að við hefðum verið valin.“

Hinn margreyndi poppari Þorvaldur Bjarni Þorvaldsson útsetti lagið fyrir þau og bætti við Eurovision-kryddinu sem til þurfti. „Það er búið að vera gaman að vinna með honum og maður er alltaf að heyra eitthvað nýtt og nýtt í laginu,“ segir Kolbrún.

Hún hlakkar að sjálfsögðu mikið til undanúrslitakvöldsins sem verður í beinni útsendingu Sjónvarpsins. „Ég er rosalega spennt en maður er að reyna að gera sig ekki stressaðan. Maður er vanur að koma fram á tónleikum og þess háttar en aldrei neinu svona. Það þarf aðeins að læra á þetta.“ - fb