Mancini: Nú vilja allir leikmenn koma til Manchester City

Roberto Mancini, stjóri Manchester City, hefur ekki miklar áhyggjur af því að það verði erfitt fyrir hann að sannfæra leikmenn um að koma til City-liðsins í janúarglugganum.

„Nú vilja allir leikmenn koma til Manchester City. Það er alveg eðlilegt því City er stórt félag með bjarta framtíð," sagði Roberto Mancini á blaðamannafundi í dag.

Mark Hughes, fyrirrennari Mancini hjá City, eyddi meira en 300 milljónum dollara í leikmenn á síðasta ári en var síðan rekinn í desember. Hughes hefði getað eytt enn meiru því hann var næstum því búinn að kaupa Kaka fyrir ári síðan en kaupin gengu til baka á síðustu stundu.

Mancini var ekki tilbúinn að gefa það upp á blaðamannafundi, fyrir leik Manchester-liðanna í deildarbikarnum á miðvikudaginn, hvaða leikmenn hann ætlaði að kaupa til City á næstunni en það bíða örugglega margir spenntir eftir fréttum af því.