Ronnie drekkur

Samkvæmt News of the World er Ronnie Wood á góðri leið með að drekka sig í hel. Og hafa vinir og vandamenn miklar áhyggjur af honum, þá sérstaklega fyrrum eiginkona hans, Jo Wood og börnin þeirra tvö. News of the World heldur því fram að liðsmaður The Rolling Stones drekki tvær flöskur af vodka á hverjum degi og hann sé að rústa eigin lífi. Eins og komið hefur fram í fjölmiðlum skildi Ronnie við eiginkonu sína og tók saman við rússnesku fyrirsætuna Ekaterinu. Því sambandi lauk með miklum látum þegar fyrirsætan unga kærði Ronnie fyrir heimilisofbeldi. News of the World hefur eftir henni að hún hafi hreinlega óttast um líf sitt og að hún hafi verið svo óhamingjusöm að hún hafi íhugað sjálfsmorð.

Jo Wood, eiginkonan fyrrverandi, hefur hins vegar ekki gefið upp alla von og reynir allt sem hún getur til að fá Ronnie til að hætta allri drykkju. Börnin þeirra tvö, Leah og Tyrone, hafa gengið í lið með móður sinni og þau hafa farið þess á leit við liðsmenn The Rolling Stones um að þeir geri allt sem þeir geti til að hífa Ronnie uppúr vodka-drykkjunni. „Mick hefur sagt við Ronnie að ef hann láti ekki af drykkjunni þá fái hann ekki að koma með í næsta tónleikaferðalag,“ hefur News of the World eftir heimildarmanni sínum.