Óljóst hvort ráðherra sé bundinn af nefndinni

Formaður nefndar um erlenda fjárfestingu segir óljóst hvort viðskiptaráðherra sé bundinn af áliti nefndarinnar. Meirihluti nefndarinnar samþykkti á mánudag, eftir margra mánaða yfirlegu, að fallast á lögmæti kaupa kanadíska félagsins Magma Energy á hlutum í HS orku. Minnihluti nefndarinnar vill að dómstólar skeri úr um lögmæti kaupanna.

Fjárfest með skúffufyrirtæki

Lög um takmarkanir á erlendri fjárfestingu segja að aðeins Íslendingar og aðilar af evrópska efnahagssvæðinu megi eiga hluti í orkufyrirtækjum. Magma fjárfestir hér á landi í gegnum skúffufélag í Svíþjóð. Meirihluti nefndarinnar telur það duga til að uppfylla skilyrði laganna.

Ráðherrann óbundinn?

Viðskiptaráðherra sagði í fréttum Rúv í gær að hann teldi sig bundinn af áliti meirihluta nefndarinnar. Unnur Kristjánsdóttir, formaður hennar segir í yfirlýsingu að ljóst sé af lögum um erlenda fjárfestingu, að hefði nefndin hafnað fjárfestingunni, þá væri ráðherrann bundinn af ákvörðun nefndarinnar. Ekki komi hinis vegar sérstaklega fram í lögunum að það sama eigi við þegar nefndin samþykki fjárfestinguna.

Fordæmi fyrir misnotkun fjórfrelsisins

Unnur bendir á í yfirlýsingu sinni að nefnd um erlenda fjárfestingu sé eingöngu úrskurðarnefnd um hvort farið sé að lögum. Hún líti því aðeins til lagalegra atriða en hvorki pólitískra né siðferðislegra álitamála í úrskurði sínum. Minnihluti nefndarinnar segir í áliti sínu gegn fjárfestingunni, að fjárfesting Magma hérlendis sé á gráu svæði og vísar þar til álita lögmanna. Kaup Magma á fjörutíu prósenta hlut í HS orku sé prófmál sem hafi mikið fordæmisgildi; hér sé fjórfrelsi evrópska efnahagssvæðissins misnotað, með þeim afleiðingum að fyrirtækið komist hjá íþyngjandi ákvæðum íslenskra laga.

Dómstólar skeri úr um málið

Framtíðarhagsmunir Íslands séu í húfi og brýnt að fá úr því skorið með dómi hvort viðskiptin standist íslensk lög. Allan vafa um málið verði að túlka íslenskum almenningi í hag og til verndar auðlindum landsins, í samræmi við markmið laga sem takmarka erlenda fjárfestingu.