Hrauneðjan stefnir hratt niður í Þórsmörk

Ein helsta náttúruparadís landsins, Þórsmörk, gæti tekið breytingum á næstu dögum. Hrauneðjan stefnir nú hratt þangað og áætlar Haraldur Sigurðsson eldfjallafræðingur að með sama hraða geti hún náð þangað á einum til tveimur dögum.

Hér sjáum við afstöðu gosstöðvanna miðað við Þórsmörk og þá leið sem áætlað að hrauneðjan muni fara. Glóandi hraunið fossar nú niður í Hrunagil en þaðan liggur leið þess niður á Krossáraura. Það hefur þegar runnið á annan kílómetra frá gígunum og á aðeins eftir 3-4 kílómetra niður á sléttlendið í Þórsmörk.

Haraldur segir að ef þetta haldi svona áfram geti hraunið verið komið niður undir Þórsmörk eftir 1-2 daga. Spurður hvort Þórsmörkin geti spillst svarar Haraldur að það fari eftir því hversu stórt hraunið verði. Eftir að það kom úr gilinu muni það breiðast út á eyrarnar. Það verði þá bara eyrarnar sem spillist.

„Að sumu leyti gæti það bara verið nokkuð gott. Þá er það bara eins og verið sé að asfalt eða sement yfir eyrarnar, - varanlegar," segir Haraldur.