Meirihlutinn í Vesturbyggð sprunginn

Meirihlutinn í Vesturbyggð er sprunginn eftir að bæjarfulltrúinn Jón Hákon Ágústsson sagði sig úr úr Bæjarmálafélaginu Samstöðu sem hefur haft meirihluta í bæjarstjórn undanfarin fjögur ár. Samtaða fékk fjóra bæjarfulltrúa kjörna í kosningunum 2006 og Sjálfstæðisflokkurinn þrjá. Þetta gerir Jón Hákon vegna óleysanlegs ágreinings varðandi umsagnir í laxeldismálum í Arnarfirði.

„Ég mun starfa áfram í bæjarstjórn og fylgja minni eigin sannfæringu við atkvæðagreiðslur út kjörtímabilið," segir Jón Hákon í yfirlýsingu. Hann segir að bæjarfulltrúar Samtöðu hafi ekki tekið til greina þær athugasemdir sem hagsmunaaðilar í Arnarfirði hafa sett fram varðandi umhverfismat og leyfi Heilbrigðiseftirlits Vestfjarða á 200 tonna laxeldi.

„Íbúar í Arnarfirði skiluðu inn undirskriftalista þar sem óskir þeirra um skilyrt leyfi til laxeldis voru ekki teknar til greina og lítilsvirtar af bæjarfulltrúum á 216. fundi bæjarstjórnar. Jafnframt var það bókað að það væri ekki þörf á umhverfismati til Skipulagsstofnunar varðandi umsögn á 3000 tonna laxeldi, þvert á vilja hagsmunaaðila. Þetta geri ég í fullu samráði við hluta kjósenda hér á Bíldudal og hef áfram fullan stuðning þeirra til áframhaldandi setu í bæjarstjórn," segir Jón Hákon.

Vesturbyggð er sveitarfélag á sunnanverðum Vestfjörðum. Til Vesturbyggðar teljast byggðakjarnarnir Birkimelur á Barðaströnd, Bíldudalur og Patreksfjörður og sveitirnar Barðaströnd, Breiðavík, Hænuvík, Ketildalir, Látrar, Rauðisandur og Suðurfirðir.