Margir bílar útaf og aðrir fastir

Björgunarsveitarmenn voru kallaðir út upp úr miðnætti til að aðstoða fólk sem hafði lent í vandræðum í óveðri á Ólafsfjarðarvegi up úr miðnætti og sat fast í bílum sínum.

Þeir voru ýmist fastir eða lentir utan vegar, en engan sakaði. Einn bílanna var sjúkrabíll með sjúkling, en þar fór líka allt vel.

Þá þykir ökumaður hafa sloppið ótrúlega vel þegar hann missti bíl sinn út af veginum um Víkurskarð á öðrum tímanum í nótt, en tókst að hafa stjórn á honum niður snar bratta fjallshlíðina uns hann nam staðar á hjólunum, langt frá þjóðveginum.

Lögreglan á Akureyri kom manninum til hjálpar, en bílnum verður náð upp í dag. Afleitt veður var á þessum slóðum líkt og var í Vatnsdal undir kvöld í gær, þar sem nokkrir bílar fóru út af veginum. Þar meiddist engin heldur.

Fyrr um daginn valt bíll og hestakerra út af Suðurlandsvegi undir Ingólfsfjalli i snarpri vindhviðu, en hvorki ökumann né hest sakaði. Hann slapp líka ómeiddur ökumaðurinn, sem missti bíl sinn útaf í Önundarfirði, valt nokkrar veltur og hafnaði út í skurði.