Stórtækur niðurskurður á Álftanesi

Í skýrslu um fjárhagslega endurskipulagningu

sveitarfélagsins Álftaness eru tillögur um hvernig mæta eigi slæmri fjárhagsstöðu sveitarfélagsins. Endurskoðunarfyrirtækið KPMG vann skýrsluna að beiðni sveitarfélagsins og var hún lögð fyrir bæjarstjórn í gærkvöldi.

Kristinn Guðlaugsson, forseti bæjarstjórnar, segir í Fréttablaðinu í dag að skera eigi niður í rekstri sveitarfélagsins um 13,5%. Fram kemur í skýrslunni að heildarskuldir Álftaness og skuldbindandi samningar sveitarfélagsins eru 7,1 milljarður króna.

Til þess að mæta þessum alvarlegu fjárhagserfiðleikum er meðal annars lagt til í skýrslunni að útsvar og fasteignaskattur hækki, leikskólagjöld hækki, heimgreiðslum til foreldra verði hætt, dregið verði úr aðkeyptri sérfræðiþjónustu, yfirvinnutímum fækkað, skólamötuneyti sameinað, vinnuskóli verði lagður tímabundið niður og opnunartíma sundlaugar og bókasafns sveitarfélagsins verði breytt. Auk þess er lagt til að stöður félagsmálastjóra, fræðslustjóra, leikskólafulltrúa, skipulagsfulltrúa og íþrótta- og tómstundafulltrúa bæjarins verði lagðar niður.