Fjölskylduhjálp býst við fimmhundruð fjölskyldum

„Við áætlum að um fimm hundruð fjölskyldur komi í dag," segir Ásgerður Jóna Flosadóttir, framkvæmdarstjóri Fjölskylduhjálpar, en í dag er þriðji úthlutunardagur mánaðarins. Í síðustu viku komu á fimmta hundrað fjölskyldna og fengu mataraðstoð. Til samanburðar þá komu um 170 til 200 fjölskyldur í janúar árið 2007.

Úthlutunin hófst klukkan tvö í dag og stendur til fimm. Nægur matur ætti að vera til handa þeim sem leita sér aðstoðar en Ásgerður tekur sem dæmi að þau Fjölskylduhjálp eigi um 1600 jógúrt á lager í dag.

Aðspurð hvernig gangi að safna pening fyrir mat segir hún að það ganga ágætlega. Fyrir því eru tvær ástæður. Annarsvegar var samþykkt hjá fjárlaganefnd Alþingi að styrkja Fjölskylduhjálp um fjórar milljónir. Hinsvegar hefur peningur safnast í gegnum sms-söfnun þar sem hundrað krónur eru færðar af símreikningi þeirra sem vilja styrkja starfið.

En ástandið er slæmt í samfélaginu að sögn Ásgerðar, „það er mjög sorglegt ástandið. Verulega napurt," áréttar hún.

Fyrir þá sem vilja leggja Fjölskylduhjálp lið er hægt að skrá sig með því að senda sms með skilaboðunum FHI í síma 1900. Þá gjaldfærast 100 krónur af símreikningnum einu sinni í mánuði. Vilji fólk afskrá sig getur það sent skilaboðin FHI stopp í sama númer.