Segir hagsmuna almennings gætt með listamannalaunum

„Tilgangurinn með listamannalaununum er að efla listsköpun í landinu," segir Oddný G. Harðardóttir, formaður menntamálanefndar Alþingis, um afstöðu almennings til listamannalauna.

Rúmlega 61% aðspurðra í könnun MMR sögðust vera á móti því að ríkið greiddi listamannalaun. Oddný segist vera þeirrar skoðunar að samfélagið hafi þörf fyrir listsköpun. Staðreyndin sé hins vegar sú að örfáir einstaklingar geti haft lífsviðurværi sitt af henni. „Það er erfiðara núna en áður þar sem fyrirtækin og heimilin leggja minna til listsköpunar," segir Oddný.

Oddný segir að ákveðins misskilnings gæti stundum í umræðunni um listamannalaun. Svo virðist vera sem fólk telji að fólk þiggi slík laun án þess að þurfa að gera grein fyrir verkefnum sínum. Staðreyndin sé hins vegar sú að listamenn sæki í sjóði til skilgreindra verkefna og þau standi yfir í mislangan tíma. „Ég er í þeim hluta sem er mjög fylgjandi því að ríkið greiði listamannalaun," segir Oddný.

Aðspurð segir Oddný að þrátt fyrir niðurstöðu könnunar MMR sé ekki verið að gæta sérhagsmuna listamanna með listamannalaununum. „Ég myndi nú ekki orða það þannig. Við teljum að við séum að gæta almennings sem vill fá að njóta listsköpunarinnar," segir Oddný. Hún bendir jafnframt á að ef spurningin hefði verið orðuð öðruvísi hefði niðurstaðan hugsanlega orðið öðruvísi.

Oddný segir mikilvægt að fólk geri sér grein fyrir muninum á listamannalaunum sem úthlutuð eru úr sérstökum sjóðum til einstakra verkefna og svo heiðurslaunum listamanna. Þeir sem fái heiðurslaun listamanna séu 29 talsins. Tilgangur heiðurslaunanna hafi í upphafi verið sá að tryggja eldri listamönnum lífeyri sem þakklætisvott frá þjóðinni fyrir að hafa fengið að njóta listsköpunar þeirra í langan tíma. „Ég tel að fyrirkomulag úthlutunar heiðurslaunanna sér tímabært að endurskoða," segir Oddný.