Byrjaðir að nota kjarnorkueldsneyti í Busher

Rússneskir og íranskir verkfræðingar hófu í morgun að koma kjarnorkueldsneyti fyrir í kjarnorkuveri í Busher í suðurhluta Írans, sem er mikilvægt skref í kjarnorkuáætlun Írana.

Bandaríkjamenn höfðu vonast til að koma í veg fyrir að starfsemi yrði hafin í verinu af ótta við að Íranir notuðu eldsneyti frá verinu til smíði kjarnorkusprengju.

Rússar aðstoðuðu við byggingu kjarnorkuversins og segjast ætla að tryggja að elsneyti þaðan verði ekki notað til smíði kjarnorkusprengju. Þótt Bandaríkjamenn leggist ekki lengur formlega gegn opnun kjarnorkuversins, segja þeir að ekki eigi að leyfa opnun þess á meðan Íranir hlýði ekki samþykktum Sameinuðu þjóðanna um kjarnorkuáætlun Írans.

Kjarnorkuverið mun framleiða þúsund megavött af rafmagni sem nýtt verður í borgum landsins.