Lamandi fyrir mörg fyrirtæki

„Ég fékk engin haldbær svör þegar ég bað um rökstuðning fyrir þessari ákvörðun bankans," segir Tryggvi Þór Herbertsson, þingmaður Sjálfstæðisflokksins. Fulltrúar Sjálfstæðisflokksins kölluðu til fundar í efnahags- og skattanefnd í gær til að fá skýringar á þeirri aðgerð bankans að hækka vaxtaálag á grunnvöxtum erlendra lána til fyrirtækja úr innan við tveimur í fjögur prósent.

Tryggvi segir að ákvörðunin sé réttlætt með því að kostnaður sé að hækka hjá bankanum. Það standist hins vegar ekki skoðun. „Ég benti þeim á að þetta muni auka vanskil fyrirtækja og leiða einhver þeirra í gjaldþrot. Það myndi síðan auka afskriftir hjá bankanum þegar fram liði."

Landsbankinn er langsamlega stærsti viðskiptabanki íslenskra fyrirtækja. Vel yfir helmingur allra sjávarútvegsfyrirtækja landsins eru til dæmis þar í viðskiptum en heildarskuldir greinarinnar eru 550 milljarðar. Tryggvi tekur dæmi af fyrirtæki sem skuldar tíu milljarða í erlendri mynt. Hækkun vaxta­álagsins þýðir um 300 milljóna álögur fyrir viðkomandi fyrirtæki sem geti skilið á milli þess að fyrirtæki haldi áfram rekstri eður ei.

Tryggvi segir aðgerð bankans taktlausa í samhengi við þau skilaboð sem koma frá stjórnvöldum og hagsmunaaðilum um stöðu fyrirtækjanna. - shá