Stöðugur straumur fólks og stemning í Fljótshlíðinni

Stöðugur straumur fólks hefur verið síðustu tvö kvöld austur í Fljótshlíð og upp á Fimmvörðuháls. Um helgina má búast við þungri umferð og jafnvel öngþveiti.

Lögreglan segir að um þúsund manns hafi verið við Þórólfsfell í Fljótshlíð í gærkvöldi, en þaðan er mjög gott útsýni yfir til gosstöðvanna.

Sveitarfélagið á staðnum hefur síðustu daga verið að útbúa betri aðstöðu við Þórólfsfell og brúa litla á svo fólksbílum sé fært að fjallinu. Yfir hundrað jeppar voru komnir lengra, alla leið inn að Emstrum þar sem vel sést yfir á Fimmvörðuháls. Þórsmörk verður hins vegar áfram lokuð allri umferð vélknúinna ökutækja, þar á meðal fjórhjóla og vélsleða.

Hjálparsveitir verða til taks ef eitthvað fer úrskeiðis og lögreglan hefur mikinn viðbúnað, meðal annars á þjóðveginum og í Fljótshlíðinni.

Þeir sem hyggja á gönguferð upp á Fimmvörðuháls til að komast í návígi við gosið eru hvattir til að fara vel búnir, í góðum skóm, hlýjum fötum og með kjarngott nesti til heils dags.

Jarðfræðingar ráðleggja fólki að halda sig á hæðum og hólum og ekki dvelja í lægðum nema vindur sé nokkur.„Það eru eiturgös sem koma úr gígnum og þau eru ekkert þægileg. Þau geta bæði skaðað lungun til langframa og þau geta líka drepið menn,“ segir Ármann Höskuldsson jarðfræðingur, sem hefur fylgst náið með þróun gossins.

Hann segir meginstraum eldhraunsins enn streyma úr gígnum í norðaustur niður í Hrunagil, en síðan á miðvikudag hefur hraunstraumurinn stíflast nokkrum sinnum og því leitað æ meir niður vestan megin, niður í Hvannárgil.

Ferðafélagið Útivist hefur skipulagt hópferð frá Skógafossi upp á Fimmvörðuháls í dag. Lagt verður af stað klukkan ellefu, og reiknað er með tólf til fimmtán klukkustunda ferð.

gudsteinn@frettabladid.is