Stjórnin hefur ekkert með ákvörðun Páls að gera

Páll Magnússon útvarpsstjóri segir að stjórn Ríkisútvarpsins muni væntanlega ræða þá ákvörðun hans að ráða Sigrúnu Stefánsdóttur sem dagskrástjóra á fundi sínum á þriðjudag. Samkvæmt lögum um Ríkisútvarpið hefur stjórnin ekkert með, þá ákvörðun hans um að ráða Sigrúnu, að gera.

Stjórnin ekkert með ráðninguna að gera

Ari Skúlason, stjórnarmaður í RÚV, sagði í samtali við Pressuna í morgun að hann vænti þess að hann myndi beita sér fyrir því að staðan yrði auglýst. Hann sagði einnig að „ekki sé eðlilegt að öllu jöfnu að ráða í stöður án auglýsingar" en hann reikni með að ráðning Páls sé ekki til frambúðar heldur tímabundin. Þá hefur Pressan eftir heimildum að sú skoðun að auglýsa stöðuna á nýjan leik njóti stuðnings innan stjórnarinnar. Á Eyjunni er haft eftir Svanhildi Kaaber, formanni stjórnarinnar, að hún eigi ekki von á því að stjórnin muni setja sig upp á móti ákvörðun Páls.

Samkvæmt 10.gr laga um Ríkisútvarpið ohf. segir: „Útvarpsstjóri ræður aðra starfsmenn Ríkisútvarpsins ohf." - Því virðist sem stjórnin hafi ekki aðkomu að ákvörðun Páls um að ráða Sigrúnu, það er því hans ákvörðun sem útvarpsstjóra.

Einungis brugðist við aðstæðum

Páll segir að ráðningin Sigrúnar sé ekki tímabundin, eins og Ari býst við, og það sé ekki skylda Ríkisútvarpsins að auglýsa stjórnunarstöður en það sé hins vegar meginstefnan. „Það er meginstefna RÚV að auglýsa lausar stjórnarstöður sem hér eru og þess vegna voru þessar tvær stöður auglýstar, staða dagskrástjóra sjónvarps og mannauðstjóra," segir Páll og tekur fram að ekki sé skylda RÚV að auglýsa stöður. „Það geta hins vegar komið upp þær aðstæður að menn víki út frá þeirri meginreglu og þær aðstæður sköpuðust í vikunni og því var brugðist við þeim."



Stjórn RÚV mun svo hittast á þriðjudaginn og býst Páll við að ráðningin beri á góma þar. „Stjórnin mun væntanlega ræða málið þá og þá skal ég ræða við þig um þetta mál," segir Páll.