Ólík viðbrögð við vanskilum

Sveitarfélögin á höfuðborgarsvæðinu hafa mjög mismunandi hátt á varðandi það hvernig þau nýta þjónustu innheimtufyrirtækja til að sækja vangoldna skatta og gjöld til íbúa sinna.

Hvorki Mosfellsbær né Hafnarfjörður nýta milliinnheimtu hjá fyrirtækjum á borð við Intrum og Momentum heldur senda sjálfir ítrekanir uns vanskilum er vísað í hefðbundna lögfræðiinnheimtu.

Mosfellsbær sendi mál 492 aðila í bænum, sem voru með samtals 34,7 milljónir króna í vangoldin fasteignagjöld, í hefðbundna lögfræðiinnheimtu.

Mál fjögurra foreldra leikskólabarna, sem skulduðu samtals 225.000 krónur fóru í lögfræðiinnheimtu frá Mosfellsbæ. Einnig mál foreldra sex barna vegna vangoldinna skólamáltíða. Vanskil þeirra voru samtals 127.000 krónur.

Fram kom í Fréttablaðinu fyrir skömmu að Reykjavíkurborg hefur nýtt innheimtufyrirtækin til að sækja um 11 prósent af fasteignagjöldum borgarbúa og hluta gjalda fyrir leikskólavist og skólamáltíðir hjá talsverðum hópi foreldra.

Kópavogsbær sendi vangoldin leikskólagjöld fyrir 20,6 milljónir króna til innheimtufyrirtækis á árinu 2009. Ekki kemur fram í svari bæjarins hve stór hópur var í vanskilum. Ef miðað er við svipuð meðalvanskil og í Reykjavík má áætla að í Kópavogi um sé að ræða að minnsta kosti 300 foreldra leikskólabarna.

Kópavogur sendi hvorki fasteignagjöld né skólamáltíðir til milliinnheimtu og ekki liggur fyrir hve háar fjárhæðir fóru þar til lögfræðiinnheimtu. Alls sendi bærinn 32 milljónir króna til milliinnheimtu, þannig að leikskólagjöldin eru um tveir þriðju af heildarfjárhæðinni.

peturg@frettabladid.is