Grunur um íkveikju í Sandgerði

Grunur leikur á að kveikt hafi verið í gömlu fiskimjölsverksmiðjunni í Sandgerði í nótt og logaði þar talsverður eldur þegar slökkvilið Sandgerðis kom á vettvang. Óskað var eftir liðsstyrk frá slökkviliðinu í Keflavík, sem sendi mannskap og tvo bíla.

Þrátt fyrir mikinn hita í húsinu, gekk slökkvistarf vel, en í húsasamstæðunni eru fleiri fyrirtæki og geymslur og barst reykur víða. Þetta er á hafnarsvæðinu í Sandgerði, en nálæg fiskvinnsluhús voru ekki í hættu.

Samkvæmt heimildum fréttastofu voru greinileg merki um innbrot í húsið. Stutt er síðan að kveikt var í stæðu af plastkörum fyrir utan fiskvinnsluhús í bænum og minnstu munaði að eldurinn læsti sig í húsið. Það mál er óupplýst og ekki er vitað hver braust inn í bræðsluna í nótt.