Alvarlegt ef ekki má tryggja börn með ADHD

Björk Þórarinsdóttir, formaður ADHD samtakanna, segir alvarlegt ef börn með ADHD njóti ekki sömu tryggingaréttinda og önnur börn. Hún segir það geta hvatt til þess að fólk forðist greiningu og meðhöndlun á röskuninni.

„Mér finnst þetta áhyggjuefni, sérstaklega ef þetta verður til þess að fólk fari að forðast greiningar og vinnur ekki með röskunina," segir Björk.

Vísir greindi í dag frá því að sjö ára gamall sonur Sunnu Albertsdóttur fékk ekki barnatryggingu frá Sjóvá. Í bréfi frá Sjóva var ástæðan sem gefin var upp sú að drengurinn þjáist af ADHD sem er ofvirknis og athyglisbrestur. Sunnu var boðið að sækja aftur um tryggingu að ári.

„ADHD er líffræðileg röskun og hún fer ekkert. Fimm til tíu prósent barna eru með ADHD, það eru tvö til þrjú börn í hverjum bekk. Fimmtíu til sjötíu prósent eru enn með einkenni sem fullorðnir og þrjátíu til fimmtíu prósent eru með alvarleg einkenni."

Björk segir það rétt að börn með ADHD geti verið líklegri til að lenda í slysum en önnur börn en með réttri meðferð, lyfjameðferð eða atferlismeðferð er hægt að lágmarka þá áhættu.

„Þess vegna er það mikilvægt að fólk leiti sér hjálpar og greiningar en það er auðvitað áhyggjuefni að á sama tíma njóta börnin verri tryggingarkjara," segir Björk.

Hún segir málið einnig vekja upp spurningar um stöðu barnanna þegar fram í sækir. „Ef þú ert einu sinni skráður í kerfið sem barn með ADHD mun það þá hafa áhrif á tryggingarstöðu þína þegar þú ert orðinn fullorðinn, vátryggingar og líftryggingar. Þetta er alvarlegt mál og þarf að skoða," segir Björk.