Þrír milljarðar í rannsóknir

Ríflega 130 styrkumsóknir bárust til AVS rannsóknasjóðs í sjávarútvegi að þessu sinni. Öll eiga verkefnin að hafa það að markmiði að auka verðmæti sjávarfangs.

Hafin er vinna við að meta umsóknirnar og er vonast til að það liggi fyrir í lok apríl hvaða verkefni fá styrk að þessu sinni. AVS sjóðurinn hefur 306 milljónir úr að spila í ár en hafði 335 milljónir 2009. Frá því sjóðurinn tók til starfa árið 2003 hefur hann styrkt hundruð verkefna með um 1,5 milljarði króna, sem þýðir í raun að unnin hafa verið rannsókna- og þróunarverkefni fyrir 3 milljarða króna hið minnsta. Ástæðan er að styrkir eru aldrei hærri en sem nemur um helmingi af kostnaði verkefnanna.

Að jafnaði hefur verið sótt um rúmlega helmingi meira fé en sjóðurinn hefur til ráðstöfunar. Í ár er hlutfallið nokkuð óhagstæðara þar sem ráðstöfunarfé sjóðsins er tæplega tíu prósentum minna en á fyrra ári.

Í ár og í fyrra var lögð áhersla á að umsækjendur kæmu með hnitmiðaðar umsóknir sem gætu skilað störfum og verðmætum á sem skemmstum tíma og hafa aldrei borist fleiri umsóknir sem taka á markaðssetningu og vöruþróun. Margar hugmyndir sem liggja fyrir geta skapað spennandi tækifæri ef væntingar umsækjenda ganga eftir.

- shá