Stýrivextir lækka of hægt

Jón Steindór Valdimarsson, framkvæmdastjóri Samtaka iðnaðarins, segir að stýrivextir lækki of hægt. Peningastefnunefnd Seðlabanka Íslands hefur ákveðið að lækka vexti bankans um hálf prósentur. Stýrivextir eru nú níu prósent.

„Þetta er skref í rétta átt en vextir hér á landi eru alltof háir og þetta þarf að ganga miklu hraðar. Maður er hættur að skilja af hverju þetta þarf að ganga svona hægt," segir Jón Steindór.

„Vaxtastigið er einfaldlega of hátt og veldur því meðal annars að peningar eru fastir í bankakerfinu. Fólk og fyrirtæki halda peningunum enn í bönkunum vegna þess að fólk metur það sem betri og öruggari kost heldur en koma þeim í umferð í atvinnulífinu. Það er mjög slæmt því við þurfum að koma hlutunum á hreyfingu," segir Jón Steindór.